కాంగ్రెస్‌తో పొత్తు వుండదు: సిపిఎం

హైదరాబాద్‌: కాంగ్రెస్‌తో తమకు పొత్తు గానీ, అవగాహన గానీ వుండదని భారత కమ్యూనిస్టు పార్టీ (మార్క్సిస్టు) ప్రధాన కార్యదర్శి హరికిషన్‌ సింగ్‌ సూర్జిత్‌ చెప్పారు. హైదరాబాద్‌లో జరుగుతున్న పార్టీ కాంగ్రెస్‌ సభల సందర్భంగా ఆయన బుధవారంవిలేకరులతో మాట్లాడారు.

కాంగ్రెస్‌ మతశక్తులనూ, వేర్పాటువాదులను బలపరుస్తున్నందున తాము ఆ పార్టీతో పొత్తుపెట్టుకోకూడదని, అవగాహన కుదర్చుకోకూడదని నిర్ణయించుకున్నామని ఆయన చెప్పారు. ఒక వేళ కేంద్రంలో బిజెపిని తప్పించి ప్రత్యామ్నాయ ప్రభుత్వాన్ని ఏర్పాటు చేయడానికి ప్రయత్నిస్తే కాంగ్రెస్‌ను బలపరిచేవిషయం ఆలోచిస్తామని ఆయన అన్నారు.

ఇటీవలి సంఘటల ద్వారా బిజెపి, దాని అనుబంధ సంస్థల బండారం బయట పడిందని, ఎన్‌డిఎ భాగస్వామ్య పక్షాల బండారం కూడా బయట పడిందని ఆయన అన్నారు.