తాత ఆస్తిపై మనవడికి హక్కు లేదు! ఆస్తి తగాదాలపై సుప్రీం జడ్జిమెంట్

తాత ముత్తాతల ఆస్తుల పంపిణీ, వారసత్వ హక్కులకు సంబంధించి దేశ అత్యున్నత న్యాయస్థానం ఒక అత్యంత కీలకమైన చారిత్రాత్మక తీర్పును వెలువరించింది. తాత ఆస్తి పంపకాలు ద్వారా తండ్రి చేతికి దక్కిన తర్వాత, ఆ ఆస్తిపై మనవడికి పుట్టుకతో ఎలాంటి హక్కు లేదా వాటా ఉండదని కోర్టు స్పష్టం చేసింది. 1956 హిందూ వారసత్వ చట్టం సెక్షన్ 8 ప్రకారం తండ్రికి దక్కిన వాటా ఆయన స్వార్జితం కిందకే వస్తుందని, తండ్రి బ్రతికి ఉండగానే ఆ ఆస్తిలో సగం వాటా కావాలంటూ మనవడు కోరేందుకు చట్ట ప్రకారం అర్హత లేదని తేల్చిచెప్పింది.

30 ఏళ్ల నాటి వివాదానికి సుప్రీం కోర్టు ముగింపు

తమిళనాడుకు చెందిన ఒక కేసు విచారణ సందర్భంగా జస్టిస్ ఆగస్టిన్ జార్జ్ మసీహ్, జస్టిస్ సునీతా అగర్వాల్‌లతో కూడిన ధర్మాసనం ఈ సంచలన తీర్పు ఇచ్చింది. చెన్నైకి చెందిన ఒక వ్యక్తి తన తాతగారి ఆస్తి విభజన ద్వారా తన తండ్రికి వచ్చిన భూమిలో సగం వాటా కావాలని 1997లో కోర్టును ఆశ్రయించాడు. తండ్రి ఆ ఆస్తిని ఇతరులకు విక్రయించడాన్ని సవాలు చేస్తూ దాఖలైన ఈ పిటిషన్‌ను గతంలో మద్రాస్ హైకోర్టు కొట్టివేసింది. దీనిపై దాఖలైన అప్పీల్‌ను తీవ్రంగా పరిశీలించిన సుప్రీం కోర్టు, హైకోర్టు ఇచ్చిన తీర్పునే సమర్థిస్తూ పిటిషన్‌ను పూర్తిగా డిస్మిస్ చేసింది.

క్లాస్-1 వారసుల చేతికి వస్తే అది సొంత ఆస్తి కిందకే లెక్కింపు

కేసు వివరాలను పరిశీలిస్తే.. తాత మరణించిన అనంతరం 1956 హిందూ వారసత్వ చట్టంలోని సెక్షన్ 8 ప్రకారం ఆస్తి క్లాస్-1 చట్టబద్ధ వారసులకు సంక్రమిస్తుంది. అలా పంపకాలు జరిగి తండ్రికి వచ్చిన వాటాపై ఆయనకు మాత్రమే సర్వహక్కులూ ఉంటాయని ధర్మాసనం వ్యాఖ్యానించింది. క్లాస్-1 వారసుల జాబితాలో మనవడి పేరు నేరుగా ఉండదని, తాత ఆస్తి విభజన పూర్తయ్యాక అది ఉమ్మడి ఆస్తిగా పరిగణించబడదని కోర్టు వివరించింది. ఆ ఆస్తిని అమ్ముకోవడం లేదా మరెవరికైనా ఇవ్వడం అనేది తండ్రి వ్యక్తిగత నిర్ణయంపైనే ఆధారపడి ఉంటుందని పేర్కొంది.

తండ్రి బ్రతికి ఉండగా మనవడికి కోరే హక్కు లేదు

మనుషుల వ్యక్తిగత సంప్రదాయాల కంటే 1956 చట్టంలోని నిబంధనలే చెల్లుబాటు అవుతాయని న్యాయమూర్తులు స్పష్టం చేశారు. తండ్రి జీవించి ఉన్న సమయంలో, ఆయన తాత నుంచి పొందిన భాగంపై కొడుకు కానీ, మనవడు కానీ 'తనకు పుట్టుకతోనే హక్కు వచ్చింది' అని క్లెయిమ్ చేయడానికి వీలులేదని సుప్రీం కోర్టు స్పష్టం చేసింది. తండ్రి తీసుకునే ఆస్తి నిర్ణయాలను సవాలు చేసే అధికారం మనవడికి లేదని తేల్చిచెప్పడంతో, దేశవ్యాప్తంగా నడుస్తున్న అనేక ఆస్తి తగాదాలకు, కోర్టు కేసులకు ఈ తీర్పు ఒక మార్గదర్శకంగా నిలవనుంది.

English summary

The Supreme Court has ruled that a grandson has no birthright in property inherited and partitioned by his father from his grandfather under Section 8 of the Hindu Succession Act, as it becomes the father's exclusive individual property.