మోత్కుపల్లి రాజీనామా- ఉపసంహరణ

నల్లగొండ: నల్లగొండ జిల్లా యాదగిరిగుట్టలో జరిగిన బాబూ జగ్జీవన్‌ రామ్‌విగ్రహాష్కరణ సభకు జిల్లా ఇన్‌ఛార్జీ మంత్రి కోటగిరి విద్యాధరరావు రాకపోవడంతో ఆలేరు శాసనసభ్యుడు మోత్కుపల్లి నర్సింహులు పార్టీకి, శాసనసభ్యత్వానికి రాజీనామా చేశారు.

ఈ కార్యక్రమంతో జిల్లా తెలుగుదేశం పార్టీలోని అంతర్గత విభేదాలు మరోసారి భగ్గుమన్నాయి. యాదగిరిగుట్ట కార్యక్రమానికి జిల్లా మంత్రి ఉమా మాధవరెడ్డిని పిలవకపోవడం చర్చనీయాంశమైంది. ఉమా మాధవరెడ్డిని పిలవనందున ఆ కార్యక్రమానికి వెళ్లకూడదని కొందరు పార్టీ నేతలు విద్యాధర రావుకు సూచించినట్లు సమాచారం. వారి సూచన మేరకు విద్యాధరరావు ఆ కార్యక్రమానికిహాజరు కాకూడదని నిర్ణయించుకుని అదే విషయాన్ని నర్సింహులుకు చెప్పారు. దీంతో ఆగ్రహం చెందిన నర్సింహులు పార్టీకి, శాసనసభ్యత్వానికి రాజీనామా లేఖలు రాసి విద్యాధరరావుకుఅందజేశారని సమాచారం. ఎట్టకేలకు విద్యాధరరావు కార్యక్రమానికి రావడానికి అంగీకరించడంతో నర్సింహులు తన రాజీనామా లేఖలను ఉపసంహరించుకున్నట్లు తెలుస్తోంది.