డ్వాక్రాలకు గ్రేడింగ్‌: చంద్రబాబు

హైదరాబాద్‌: మహిళాస్వయం సహాయక గ్రూప్‌లకు (డ్వాక్రాలకు) గ్రేడింగ్‌ ఇచ్చే పద్ధతిని ప్రవేశపెట్టనున్నట్లు ముఖ్యమంత్రి నారా చంద్రబాబు నాయుడు తెలిపారు. ఈ గ్రేడింగ్‌ల ద్వారా పని చేయనివాటిని గుర్తించి వాటిని రద్దు చేస్తామని ఆయన అన్నారు.

ఉత్తమసేవలందించిన బ్యాంకులకు, జిల్లా సహకార బ్యాంక్‌లకు, డ్వాక్రా గ్రూప్‌లు బాగా పని చేసిన జిల్లాలకు ఆయన మంగళవారం అవార్డులుఅందజేశారు. ఆంధ్రా బ్యాంక్‌, నిజామాబాద్‌ సహకార గ్రామీణ బ్యాంక్‌, తూర్పు గోదావరి జిల్లా ఈ అవార్డులుఅందుకున్నాయి. డ్వాక్రా గ్రూప్‌ల సంఖ్యను పెంచడానికి కాకుండా వాటి పని తీరు మెరుగు పరచడానికి ఎక్కువ ప్రాధాన్యం ఇస్తామని ముఖ్యమంత్రి చెప్పారు. డ్వాక్రాల పనితీరును మరింత లోతుగా పరిశీలించి వాటి పని తీరును మెరుగు పరుస్తామని ఆయన చెప్పారు. డ్వాక్రా గ్రూప్‌లకు సహాయంఅందించడానికి బ్యాంక్‌లు మరింతగా ముందుకు రావాలని ఆయన సూచించారు. డ్వాక్రాలకు ఇచ్చే రుణాలపై వడ్డీ శాతం మరో ఒక శాతం తగ్గిస్తామని ఆంధ్రా బ్యాంక్‌ తెలియజేసింది.