సోనియాతో దేశానికిఅరిష్ఠంః జయ

న్యూఢిల్లీః తమిళనాడు ముఖ్యమంత్రి జయలలిత అనూహ్యంగా కాంగ్రెస్‌ అధ్యక్షురాలు సోనియాగాంధిపై విరుచుకుపడ్డారు. ఓ రకంగా కాంగ్రెస్‌ పార్టీని చావుదెబ్బ తీశారు. సోనియా గాంధీ విదేశీయురాలని, ఆమె ప్రధాని పదవికి అనర్హురాలని చెప్పారు. సోనియా గాంధీ కారణంగా కాంగ్రెస్‌ పార్టీ మట్టికొట్టుకు పోతుందని ఆమె శపించారు. సోనియా గాంధీ ఇటీవల కాలంలో చెన్నై లో జరిగిన బహిరంగ సభలో జయలలిత పాలనపై ధ్వజమెత్తారు. అహం దెబ్బతిన్న జయలలిత ఢిల్లీ వీధుల్లో సోనియాపై దుమ్మెత్తి పోశారు.

గతంలో సోనియాగాంధీతో చెట్టాపట్టాలేసుకు తిరిగిన జయలలిత ఈ మధ్య కాలంలో కాంగ్రెస్‌ కు ఆమడదూరంలో వుంటున్నారు. క్రమంగా బిజెపికి దగ్గరవుతున్నారు. బిజెపికి సన్నిహితంగా వుంటూ ఆంధ్రప్రదేశ్‌ ముఖ్యమంత్రి చంద్రబాబు నాయుడు ఢిల్లీలో చక్రం తిప్పుతున్న వైనాన్ని గమనించిన జయ ఎందుకైనా మంచిదని ఎన్డీఏ సర్కార్‌ తో మంచిగా వుండాలని నిర్ణయించుకున్నారు.అందులో భాగంగానే సోనియా మీద తిరుగులేనిఅస్త్రాన్ని ప్రయోగించారు. కావేరి రివర్‌ అధారిటీ సమావేశంలో పాల్గొనేందుకు ఢిల్లీ వచ్చిన జయలలిత బహిరంగంగావిలేకర్ల సమావేశంలో సోనియాను తిట్టిపోశారు. ఒక విదేశీయురాలిని దేశప్రధానిని చేయాలనుకోవడం కాంగ్రెస్‌ కు సిగ్గుచేటని ఆమె వ్యాఖ్యానించారు. జాతీయ రాజకీయాల్లో సోనియా ఇప్పటి వరకు శకునిపాత్ర పోషించారని జయ వ్యాఖ్యానించారు. సోనియాపై ఈ స్థాయిలో వ్యక్తిగతవిమర్శలు చేయగల సత్తా జయకుతప్ప మరెవరికీ వుండదేమో?!