చిన్న రాష్ట్రాలకు వ్యతిరేకం: ములాయం

హైదరాబాద్: తాము రాష్ట్రాల విభజనకు వ్యతిరేకమని సమాజ్ వాదీ పార్టీ నాయకుడు, ఉత్తరప్రదేశ్ మాజీ ముఖ్యమంత్రి ములాయం సింగ్ యాదవ్ చెప్పారు. చిన్న రాష్ట్రాల వల్ల నక్సలైట్ సమస్య పెరుగుతుందని, చిన్న రాష్ట్రాల్లో మావోయిస్టుల ప్రాబల్యం పెరిగిందని ఆయన అన్నారు. యుఎన్ పిఎ సమావేశంలో పాల్గొనడానికి వచ్చిన ఆయన తెలుగుదేశం పార్టీ అధ్యక్షుడు నారా చంద్రబాబునాయుడితో కలిసి ఆదివారం మీడియా ప్రతినిధుల సమావేశంలో పాల్గొన్నారు. పెద్ద రాష్ట్రాల్లో నక్సల్స్ సమస్య ఎదుర్కోవడం సులభమని ఆయన అన్నారు.

జార్ఖండ్, చత్తీస్ ఘడ్ రాష్ట్రాల్లోని నక్సల్స్ సమస్యను ఆయన ఈ సందర్భంగా గుర్తు చేశారు. అధికారం కోసమే చిన్న రాష్ట్రాల ఏర్పాటు ఉద్యమాలను ముందుకు తెస్తున్నారని ఆయన అన్నారు. తమ కూటమిలో ఉండాలని ఎవరినీ బలవంత పెట్టబోమని సమాజ్ వాదీ పార్టీ నేత అమర్ సింగ్ అన్నారు. యుఎన్ పిఎ నాయకులను ప్రభుత్వం వేధిస్తోందని చంద్రబాబు నాయుడు విమర్శించారు. ప్రజాసమస్యలపై పార్లమెంటు సమావేశాల సందర్భంగా ధర్నాలు చేస్తామని ఆయన చెప్పారు.