మా మాటలు చెప్తాం: ఎమ్మెస్సార్

కరీంనగర్: తమ అభిప్రాయాలను తమ పార్టీ అధ్యక్షురాలు సోనియా గాంధీకి వివరిస్తామని సీనియర్ కాంగ్రెస్ శాసనసభ్యుడు ఎం. సత్యనారాయణరావు అన్నారు. తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖరరావు కరీంనగర్ లోకసభ ఉప ఎన్నికలో తన శాసనసభా నియోజకవర్గంలోనే 50 వేల మెజారిటీ వచ్చిందని, దాంతోనే తెలంగాణ ఆకాంక్ష ఎంత బలంగా ఉందో అర్థమైందని ఆయన మంగళవారం ఒక ప్రైవేట్ తెలుగు టీవీ చానెల్ కు ఇచ్చిన ఇంటర్వ్యూలో అన్నారు.

తెలంగాణ గురించి తానొక్కడ్నే మాట్లాడడం లేదని, చాలా మంది మాట్లాడుతున్నారని ఆయన అన్నారు. సీనియర్ నాయకుడు జి. వెంకటస్వామి కూడా మాట్లాడుతున్నారని, తెలంగాణ ఇవ్వకపోతే పార్టీ నాశనమవుతుందనే బాధతోనే మాట్లాడుతున్నామని ఆయన అన్నారు. తెలంగాణ విషయంలో తమకు స్వార్థం లేదని, పార్టీ నాశనమవుతుంటే చూస్తూ కోర్చోలేమని ఆయన అన్నారు.