అజర్ తో కెసిఆర్ రహస్య భేటీ

హైదరాబాద్: భారత క్రికెట్ జట్టు మాజీ కెప్టెన్ మహ్మద్ అజరుద్దీతో తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖరరావు సమావేశమయ్యారు. ఇరువురి మధ్య రెండు గంటలకు పైగా చర్చలు జరిగాయి. వారిద్దరి మధ్య చర్చలు జరిగిన విషయాన్ని తెరాస వర్గీయులు ధృవీకరిస్తున్నప్పటికీ వారెక్కడ సమావేశమైందీ వెల్లడించడం లేదు. అజర్ తెరాసలో చేరుతారనే ప్రచారం గత కొంతకాలంగా జరుగుతోంది. వారిరువురి మధ్య జరిగిన చర్చల సారాంశం తెలియడం లేదు. అయితే అజర్ ను చంద్రశేఖర రావు పార్టీలోకి ఆహ్వానించినట్లు చెబుతున్నారు.

హైదరాబాద్ లో పాగా వేయడానికి చంద్రశేఖరరావు చాలా కాలంగా ప్రయత్నాలు చేస్తున్నారు. ముస్లింలకు వరాలు ప్రకటిస్తూ వస్తున్నారు. ముస్లింలకు దగ్గరై తెలంగాణ ఉద్యమానికి మద్దతు కూడగట్టడానికి ప్రయత్నిస్తున్నారు. ఇందులో భాగంగానే కెసిఆర్ అజరుద్దీన్ ను కలుసుకున్నట్లు సమాచారం. పార్టీలో అజర్ కు సముచిత స్థానం ఇవ్వడానికి కెసిఆర్ సుముఖంగా ఉన్నట్లు చెబుతున్నారు.