ప్రయాణికులపై లాలూ రైలు కరుణ

న్యూఢిల్లీ: ప్రయాణికులపై రైల్వే మంత్రి లాలూ ప్రసాద్ యాదవ్ కరుణ చూపించారు. 2008 - 2009 సంవత్సరానికి గాను ఆయన మంగళవారం ప్రతిపాదించిన రైల్వే బడ్జెట్టులో ఆయన రైల్వే చార్జీలను తగ్గించారు. వివిధ వర్గాల ప్రయాణికులకు రాయితీలు కూడా కల్పించారు. స్లీపర్ కోచ్ ల చార్జీలను 5 శాతం, ఎసి - 1 చార్జీలను 7 శాతం, సెకండ్ క్లాసు చార్జీలను 5 శాతం, ఎసి త్రీటైర్ చార్జీలను 2 శాతం తగ్గించారు. సీనియర్ సిటిజన్స్ కు చార్జీలో 50 శాతం, 50 ఏళ్లు దాటిన మహిళలకు 50 శాతం, ఆస్పత్రులకు వెళ్లే ఎయిడ్స్ రోగులకు 50 శాతం రాయితీలు కల్పించారు. డిగ్రీ వరకు బాలికలకు, ఇంటర్మీడియట్ వరకు మగపిల్లలకు ఉచిత ప్రయాణ సౌకర్యం కల్పిస్తున్నారు. చదువుకుంటున్న బాలికలకు ఉచిత సీజనల్ టికెట్లు ఇస్తామని ఆయన చెప్పారు. సరుకు రవాణా చార్జీలను కూడా ఆయన తగ్గించారు. ప్రయాణికులే తమ దేవుళ్లని ఆయన చెప్పారు. నిరుపేదలే తన లక్ష్యమని, అందువల్ల రైల్వే చార్జీలు పెంచడం లేదని ఆయన చెప్పారు. 50 కిలోమీటర్ల లోపు ప్రయాణానికి చార్జీల్లో ఒక రూపాయి తగ్గించారు.

ప్రస్తుత ఆర్థిక సంవత్సరంలో రైల్వే 25 వేల కోట్ల రూపాయల లాభాలు సాధించినట్లు ఆయన తెలిపారు. ఫార్చూన్ 500 కంపెనీల కన్నా రైల్వేల పనితీరు బాగుందని ఆయన చెప్పారు. యుపిఎ విధానాలే రైల్వే లాభాల్లో నడవడానికి కారణమని ఆయన చెప్పారు. లాభాల్లో రైల్వే సరికొత్త రికార్డు సృష్టించిందని ఆయన చెప్పారు. రాబోయే ఆర్థిక సంవత్సరంలో రైల్వే 23 వేల కోట్ల రూపాయల లాభాలు ఆర్జించగలదని ఆయన అంచనా వేశారు. 2007 - 2008లో రైల్వే ఆదాయం 14 వేల కోట్ల రూపాయలు ఉందని ఆయన చెప్పారు. టికెట్ ఆదాయంలో 14 శాతం, సరుకు రావాణాలో 11 శాతం వృద్ధి సాధించినట్లు ఆయన తెలిపారు. నాలుగేళ్లలో రైల్వే ప్రణాళిక 11 వేల కోట్ల నుంచి 30 వేల కోట్ల రూపాయలకు పెరిగిందని ఆయన చెప్పారు.

ముఖ్యాంశాలు