తెలంగాణ ధూంధాంలో అద్వానీ

న్యూఢిల్లీ: ఢిల్లీలోని జంతర్ మంతర్ వద్ద జరిగిన తెలంగాణ ధూంధాం కార్యక్రమంలో గురువారంనాడు భారతీయ జనతా పార్టీ (బిజెపి) అగ్రనేత ఎల్.కె. అద్వానీ పాల్గొన్నారు. తెలంగాణ రాష్ట్రం ఏర్పాటుకు పార్లమెంటులో బిల్లు పెడితే తాము బలపరుస్తామని అద్వానీ చెప్పారు. తెలంగాణపై కాంగ్రెసుకు నిజాయితీ లేదని ఆయన విమర్శించారు. తాము రెండో ఎస్సార్సీకి వ్యతిరేకమని, రెండో ఎస్సార్సీ వేస్తే ప్రతి జిల్లా ఒక రాష్ట్రం కావాలనే డిమాండ్ వస్తుందని ఆయన అన్నారు. జీవనశైలి ప్రకారం రాష్ట్రాలు ఏర్పడాలని ఆయన అభిప్రాయపడ్డారు.

తాము అధికారంలోకి వచ్చిన వెంటనే తెలంగాణ ఇస్తామని అద్వానీ హామీ ఇచ్చారు. ధూంధాం కార్యక్రమంలో ప్రజా వాగ్గేయకారుడు గద్దర్ నేతృత్వంలో సాంస్కృతిక కార్యక్రమాలు జరిగాయి. ఈ కార్యక్రమంలో బిజెపి నాయకులు బండారు దత్తాత్రేయ, సిహెచ్. విద్యాసాగరరావు, కాంగ్రెస్ పార్లమెంటు సభ్యులు జి. వెంకటస్వామి, మధుయాష్కీ గౌడ్ పాల్గొన్నారు.