మధుయాష్కీకి చంద్రబాబు మద్దతు

హైదరాబాద్: తెలంగాణ రాష్ట్ర సాధన కోసం మాట్లాడుతున్న కాంగ్రెస్ పార్లమెంటు సభ్యుడు మధుయాష్కీ గౌడ్ కు తెలుగుదేశం పార్టీ అధ్యక్షుడు నారా చంద్రబాబునాయుడు అండగా నిలిచారు. ఫోర్జరీ పత్రాలపై తన కుటుంబ సభ్యులను అమెరికాకు పంపించినట్లు వచ్చిన వార్తలను ఖండిస్తూ ముఖ్యమంత్రి పేషీయే వాటిని సృష్టించిందని మధుయాష్కీ ఆరోపించారు. ఫోర్జరీ పత్రాల సృష్టిలో ముఖ్యమంత్రి పేషీ పాత్రను బయట పెట్టాలని చంద్రబాబు గురువారం మీడియా ప్రతినిధుల సమావేశంలో డిమాండ్ చేశారు. తనపై విమర్శలు చేసే వారిపై ముఖ్యమంత్రి కక్ష గడుతున్నారని ఆయన అన్నారు.

ముఖ్యమంత్రి తప్పుడు సమాచారం ఇస్తున్నారని, అబద్దాలు మాట్లాడుతున్నారని ఆయన అన్నారు. ముఖ్యమంత్రిని, ఆయన దోపిడీ బృందాన్ని ఎవరు ఏమన్నా వారి పని అయిపోయినట్లేనని చంద్రబాబు అన్నారు. ముఖ్యమంత్రి వైయస్ రాజశేఖర రెడ్డిది నియంత పాలన అని ఆయన వ్యాఖ్యానించారు. పోలీసులను, అధికారులను ముఖ్యమంత్రి దుర్వినియోగం చేస్తున్నారని ఆయన విమర్శించారు.