బడ్జెట్ పై బాబు పెదవి విరుపు

హైదరాబాద్: కేంద్ర ఆర్థిక మంత్రి పి. చిదంబరం ప్రతిపాదించిన బడ్జెట్ పట్ల తెలుగుదేశం పార్టీ అధ్యక్షుడు నారా చంద్రబాబునాయుడు అసంతృప్తి వ్యక్తం చేశారు. బడ్జెట్ ఆర్థిక వ్యత్యాసాలను పెంచేదిగా ఉందని ఆయన శుక్రవారం మీడియా ప్రతినిధుల సమావేశంలో అన్నారు. రైతుల మధ్య తేడాలు పెట్టి కొందరి రుణాలను మాఫీ చేసి కొందరికి రాయితీ ఇవ్వడం పట్ల ఆయన అభ్యంతరం తెలియజేశారు. వ్యవసాయం ద్వారా లక్షాధికారులు ఎవరూ కావడం లేదని, రైతులందరి రుణాలను మాఫీ చేయాల్సిన అవసరం ఉందని ఆయన అన్నారు.

రైతుల ఆత్మహత్యలు పెరుగుతున్నాయని, రైతులు అప్పుల ఊబిలో కూరుకపోయి ఇబ్బందులకు గురవుతున్నారని, రైతుల రుణాలను మాఫీ చేయాలని తాము డిమాండ్ చేస్తూ వస్తున్నామని ఆయన వివరించారు. బడ్జెట్ లో స్వామినాథన్ కమిటీ సిఫార్సుల ప్రస్తావన లేకపోవడాన్ని ఆయన తప్పు పట్టారు. బడ్జెట్ పేదలను నిర్లక్ష్యం చేసిందని ఆయన అన్నారు.