కాపులకు బీసీ స్ధితిపై అధ్యయన కమిషన్: వైఎస్ హామీ

హైదరాబాద్ : కాపులను బీసీల్లో చేర్చే విషయంపై అధ్యయన కమిషన్‌ను ఏర్పాటు చేయనున్నట్టు ముఖ్యమంత్రి వైఎస్ హామీ ఇచ్చారు. చాలాకాలంగా ఉన్న ఈ డిమాండ్‌పై అధ్యయనం జరిపి, కమిషన్ ఇచ్చే నివేదిక ఆధారంగా చర్యలు తీసుకుంటామన్నారు.

సచివాలయంలో కాపు వర్గానికి చెందిన మంత్రులు కన్నా లక్ష్మీనారాయణ, మండలి బుద్ధప్రసాద్, జక్కంపూడి రామ్మోహనరావు, బొత్స సత్యనారాయణ, ఎంపీ బాలశౌరి తదితరులు ముఖ్యమంత్రిని కలసి దీనికి సంబంధించి ఓ వినతిపత్రం సమర్పించారు.

కాపు, బలిజ, తెలగ, ఒంటరి కులాల స్థితిగతులపై అధ్యయనం చేయించాలని కోరారు. వారి విజ్ఞప్తిపై సానుకూలంగా స్పందించిన ముఖ్యమంత్రి త్వరలోనే దీనికి సంబంధించి ఆదేశాలు జారీ చేయగలమని హామీ ఇచ్చారు.