పోలిట్ బ్యూరో భర్త, కేంద్రకమిటీలో భార్య

కోయంబత్తూర్: సిపియం కేంద్ర కమిటీ ప్రధాన కార్యదర్శిగా ప్రకాశ్ కారత్ తిరిగి ఎన్నికయ్యారు. ఇక్కడ జరిగిన 19వ పార్టీ మహాసభల్లో గురువారంనాడు ఈ ఎన్నిక జరిగింది. పోలిట్ బ్యూరో పునర్వ్యస్థీకరణ జరిగింది. ఇందులో వృద్ధ నేతలు జ్యోతిబసు, హరికిషన్ సింగ్ సూర్జీత్ లకు స్థానం దక్కలేదు. ఆంధ్రప్రదేశ్ రాష్ట్ర పార్టీ కార్యదర్శి బి.వి. రాఘవులుకు, సీతారాం ఏచూరికి తిరిగి పోలిట్ బ్యూరోలో స్థానం దక్కింది. రాఘవులు భార్య పుణ్యవతికి, శాసనసభ్యుడు గఫూర్ కు కేంద్ర కమిటీలో స్థానం కల్పించారు. రాష్ట్రానికి చెందిన మల్లు స్వరాజ్యం కేంద్ర కమిటీకి ప్రత్యేక ఆహ్వానితురాలు. జ్యోతిబసు పోలిట్ బ్యూరో సమావేశాలకు ప్రత్యేక ఆహ్వానితులవుతారు. సూర్జిత్ కేంద్ర కమిటీ సమావేశాలకు ప్రత్యేక ఆహ్వానితులు.

అత్యున్నత నిర్ణయాత్మక సంస్థ పోలిట్ బ్యూరో సభ్యులుగా ప్రకాశ్ కారత్, వి.ఎస్. అచ్యుతానంద్, ఎస్. రామచంద్రన్ పిళ్లై, సీతారాం ఏచూరి, ఎం.కె. పాండే, బిమన్ బస్, మాణిక్ సర్కార్, పినరాయి విజయన్, బుద్ధదేవ్ భట్టాచార్య, కె. వరదరాజన్, రాఘవులు, బృందా కారత్, మొహమ్మద్ అమిన్, నిరుపమ్ సేన్, కొడియేరి బాలకృష్ణన్ ఎన్నికయ్యారు. నూత స్వేచ్చా ఆర్థిక విధానాలపై, మతతత్వ శక్తులపై పోరాడాలని సిపియం మహాసభ నిర్ణయం తీసుకుంది. అమెరికాకు భారత్ జూనియర్ భాగస్వామిగా కావడాన్ని అంగీకరించబోమని స్పష్టం చేసింది.

కాంగ్రెస్ నేతృత్వంలోని యుపిఎకు, బిజెపి నేతృత్వంలోని ఎన్డీయేలకు ప్రత్యామ్నాయంగా మూడో కూటమిని ఏర్పాటు చేయడానికి ప్రయత్నాలు చేస్తామని సిపియం ప్రధాన కార్యదర్శి కారత్ చెప్పారు. ప్రస్తుతం వామపక్ష, ప్రజాతంత్ర కూటమిని ఏర్పాటు చేస్తామని, తదుపరి తృతీయ ప్రత్యామ్నాయం ఏర్పాటుకు ప్రయత్నాలు చేస్తామని ఆయన చెప్పారు.