చంద్రబాబు పార్టీలో లుకలుకలు: రోశయ్య

హైదరాబాద్: పార్టీలోని లుకలుకలను కప్పిపుచ్చుకోవడానికి తెలుగుదేశం పార్టీ అధ్యక్షుడు నారా చంద్రబాబు నాయుడు ప్రభుత్వంపై శాసనసభలో అవిశ్వాస తీర్మానాన్ని ప్రతిపాదించారని రాష్ట్ర ఆర్థిక మంత్రి కె. రోశయ్య వ్యాఖ్యానించారు. కోటగిరి విద్యాధరరావు ఇప్పటికే వెళ్లిపోయారని, ఇంకా కొంత మంది చంద్రబాబుతో విభేదిస్తున్నారని, వారి పేర్లు తాను చెప్పడం భావ్యం కాదని, వారెవరో మీడియాకు తెలుసునని ఆయన గురువారం మీడియా ప్రతినిధుల సమావేశంలో అన్నారు. అవిశ్వాస తీర్మానం అంటే రోజూ మాట్లాడే అంశాలు కాకుండా, ప్రత్యేకమైన అంశాన్ని లేవనెత్తుతారని తాము అనుకున్నామని ఆయన అన్నారు.

తాము భూములు అమ్మి బడ్జెట్టు లోటును భర్తీ చేసుకుంటున్నామనే మాటలో నిజం లేదని ఆయన అన్నారు. భూముల అమ్మకానికి చంద్రబాబునాయుడు ప్రభుత్వమే జీవో ఇచ్చిందని ఆయన అన్నారు. రెండు రూపాయల కిలో బియ్యం విషయంలో ఆత్మను చంపుకుని చంద్రబాబు పాలన చేశారని ఆయన అన్నారు. చంద్రబాబు చేసే పనులకు, చెప్పే మాటలకు పొంతన లేదని, చంద్రబాబుది మోసపూరిత రాజకీయమని ఆయన విమర్శించారు. శ్రీకృష్ణుని పాత్ర వేసి బఫూన్ పాట ఎలా అని ఆయన అడిగారు.