తొందరెందుకు?: డి. శ్రీనివాస్

హైదరాబాద్: రాష్ట్రంలో సమీకరణాలు ఎన్నికలకు రెండు, మూడు నెలల ముందు మారుతాయని ప్రదేశ్ కాంగ్రెస్ కమిటీ (పిసిసి) అధ్యక్షుడు డి. శ్రీనివాస్ అన్నారు. గత ఎన్నికల్లో నాలుగు కండువాల్లో వెళ్లామని, వచ్చే ఎన్నికల్లో కూడా అలా వెళ్లాలని ఉందని తాను అన్నట్లు ఆయన బుధవారం మీడియా ప్రతినిధుల సమావేశంలో తెలిపారు. తన ఉద్దేశం తాను చెప్పానని, సిపియం రాష్ట్ర కార్యదర్శి రాఘవులుకు తొందరెందుకని ఆయన అన్నారు. కాంగ్రెస్ ను ఏకాకిని చేయడానికి ప్రతిపక్షాలన్నీ ఏకం కావాలని రాఘవులు అన్నారు.

అందర్నీ కలుపుకుని పోవాలనేది తమ ఉద్దేశమని శ్రీనివాస్ అన్నారు. జిల్లా కాంగ్రెస్ కమిటీ (డిసిసి)ల్లో మార్పు ఉండదని, మార్చే ఉద్దేశం తనకు లేదని ఆయన చెప్పారు. ఉప ఎన్నికల్లో జడ్చర్ల నుంచి తమ పార్టీ నాయకుడు మల్లు రవి పోటీ చేస్తానని అంటున్నారని, అది మల్లు రవి ఉద్దేశమని, పార్టీపరంగా నిర్ణయం తీసుకోవాల్సి ఉంటుందని ఆయన అన్నారు.