చలో రాజభవన్: బిజెపి నేతల అరెస్టు

హైదరాబాద్: నిత్యావసర ధరల పెరుగుదలకు నిరసనగా భారతీయ జనతా పార్టీ చేపట్టిన చలో రాజభవన్ కార్యక్రమం ఉద్రిక్తంగా మారింది. రాజభవన్ వైపు దూసుకెళ్లడానికి ప్రయత్నించిన బిజెపి కార్యకర్తలను, నాయకులను పోలీసులు ఖైరతాబాద్ చౌరస్తా వద్ద శుక్రవారం అడ్డుకునే ప్రయత్నం చేశారు. దీంతో పోలీసులకు, బిజెపి కార్యకర్తలకు మధ్య తోపులాట జరిగింది. పోలీసులు బిజెపి నాయకులు ఎం. వెంకయ్యనాయుడు, బండారు దత్తాత్రేయ, ఎన్. ఇంద్రసేనారెడ్డిలతో పాటు పలువురు నాయకులను, కార్యకర్తలను అరెస్టు చేశారు.

నిత్యావసర సరుకుల ధరలను అదుపు చేయలేని యుపిఎ ప్రభుత్వం గద్దె దిగాలని బిజెపి నాయకుడు ఎం. వెంకయ్యనాయుడు డిమాండ్ చేశారు. కాంగ్రెస్ అధికారంలోకి వచ్చిన ప్రతిసారీ నిత్యావసర సరుకుల ధరలు పెరుగుతున్నాయని ఆయన విమర్శించారు. పార్లమెంటు సమావేశాల తొలి రోజే ఈ అంశాన్ని లేవనెత్తుతామని ఆయన చెప్పారు. ముఖ్యమంత్రి డాక్టర్ వైయస్ రాజశేఖర రెడ్డి అధికారంలో కొనసాగడానికి అర్హులు కారని దత్తాత్రేయ అన్నారు.