సిఎందంతా మోసం: హరీష్

సిద్ధిపేట: ముఖ్యమంత్రి డాక్టర్ వైయస్ రాజశేఖర రెడ్డి తెలంగాణ ప్రజలను మోసం చేస్తున్నారని తెలంగాణ రాష్ట్ర సమితి (తెరాస) నాయకుడు హరీష్ రావు విమర్శించారు. సర్వేలు, అనుమతులు లేకుండా ప్రాణహిత - చేవెళ్ల ప్రాజెక్టును ఎలా పూర్తి చేస్తారని ఆయన శుక్రవారం మీడియా ప్రతినిధుల సమావేశంలో అడిగారు. చేవెళ్ల - ప్రాణహిత ప్రాజెక్టు నిర్మాణానికి 30 వేల కోట్ల రూపాయల ఖర్చవుతాయని, 260 కోట్ల రూపాయలు కేటాయిస్తే ఎన్నాళ్లకు ఈ ప్రాజెక్టు పూర్తవుతుందని, ప్రాజెక్టు నిర్మాణంపై ప్రభుత్వానికి చిత్తశుద్ధి లేదని ఆయన అన్నారు.

హైదరాబాదు చుట్టుపక్కల భూములు అమ్మగా వచ్చిన 12 వేల కోట్ల రూపాయలు ప్రాణహిత - చేవెళ్ల ప్రాజెక్టుకు కేటాయించాలని ఆయన డిమాండ్ చేశారు. తాము రాజీనామా చేయకముందు తమ నియోజకవర్గాలకు పిలిస్తే ముఖ్యమంత్రి డాక్టర్ వైయస్ రాజశేఖర రెడ్డి రాలేదని, ఇప్పుడు ఉరుకులు పరుగుల మీద వస్తున్నారని ఆయన అన్నారు. ఉప ఎన్నికలు జరుగుతాయి కాబట్టి ప్రజలను మభ్యపెట్టడానికి ముఖ్యమంత్రి తెలంగాణలో పర్యటిస్తున్నారని, ఇది తెలంగాణ ప్రజలకు బాగు తెలుసునని ఆయన అన్నారు.