చౌక బియ్యం మోసం: కెసిఆర్

నల్లగొండ: ముఖ్యమంత్రి డాక్టర్ వైయస్ రాజశేఖర రెడ్డి ప్రవేశపెట్టిన రెండు రూపాయలకు కిలో బియ్యం పథకం పచ్చి మోసమని తెలంగాణ రాష్ట్ర సమితి అధ్యక్షుడు కె. చంద్రశేఖర రావు వ్యాఖ్యానించారు. ఉప ఎన్నికల్లో తమ పార్టీ అభ్యర్థులను ఓడించడానికి కాంగ్రెస్, తెలుగుదేశం పార్టీలు కుట్ర పన్నుతున్నాయని ఆయన శుక్రవారం మీడియా ప్రతినిధులతో అన్నారు. ఉప ఎన్నికల్లో ఏ పార్టీతోనూ పొత్తు ఉండదని ఆయన స్పష్టం చేశారు.

ముఖ్యమంత్రి కరీంనగర్ జిల్లా పర్యటన సందర్భంగా తమ పార్టీ కార్యకర్తలను పోలీసులు అరెస్టు చేయడం దారుణమని ఆయన అన్నారు. తమ పార్టీ కార్యకర్తలను పోలీసులు అరెస్టు చేసినందుకు ముఖ్యమంత్రి క్షమాపణ చెప్పాలని ఆయన డిమాండ్ చేశారు. ప్రాణహిత - చేవెళ్ల ప్రాజెక్టు పూర్తయ్యేది కాదని ఆయన అన్నారు. తెలంగాణలోని సాగునీటి ప్రాజెక్టులపై ముఖ్యమంత్రికి చిత్తశుద్ధి లేదని ఆయన విమర్శించారు. ప్రాణహిత - చేవెళ్ల ప్రాజెక్టుకు ముఖ్యమంత్రి డాక్టర్ వైయస్ రాజశేఖర రెడ్డి శుక్రవారంనాడు శంకుస్థాపన చేశారు.