కోర్టుకు హాజరైన పవన్ కళ్యాణ్

విశాఖపట్నం: విడాకులు, మనోవర్తి కేసులో సినీ నటుడు పవన్ కళ్యాణ్ శుక్రవారంనాడు విశాఖపట్నం ఫ్యామిలీ కోర్టులో హాజరయ్యారు. ఆయనను చూడడానికి పెద్ద యెత్తున అభిమానులు తరలి వచ్చారు. ఇన్ కెమెరా ప్రొసీడింగ్స్ కావడంతో విచారణకు ఎవరినీ రానీయలేదు. అయితే పవన్ కళ్యాణ్ క్రాస్ ఎగ్జామినేషన్ జరగలేదు. కేసు విచారణ ఈ నెల 25వ తేదీకి వాయిదా పడింది.

పవన్ కళ్యాణ్ భార్య నందిని తరఫు న్యాయవాదులు మరో రెండు పిటిషన్స్ వేశారు. కేసు తేలేవరకు తనకు తాత్కాలిక భృతి కల్పించాలని కొరుతూ నందిని ఒక పిటిషన్ వేశారు. అలాగే 2002 నుంచి 2007 వరకు పవన్ కళ్యాణ్ ఆదాయం పన్ను రిటర్న్స్ ను సమర్పించాలని కోరుతూ మరో పిటిషన్ దాఖలు చేశారు. దీంతో పవన్ కళ్యాణ్ క్రాస్ ఎగ్జామినేషన్ కు వీలు కాలేదు. విచారణ దాదాపు అరగంట సేపు సాగింది.