ఉచిత బియ్యం వద్దు: డిఎస్

హైదరాబాద్: పేదలకు ఉచితంగా బియ్యం ఇవ్వకూడదని ప్రదేశ్ కాంగ్రెస్ కమిటీ (పిసిసి) అధ్యక్షుడు డి. శ్రీనివాస్ కాంగ్రెస్ నాయకులకు సూచించారు. ఉచిత బియ్యం పంపిణీ వల్ల రెండు రూపాయలకు కిలో బియ్యం పథకం అమలు ఉద్దేశం దెబ్బ తింటుందని ఆయన శుక్రవారం మీడియా ప్రతినిధుల సమావేశంలో అన్నారు. పేదలకు సేవ చేయాలనుకుంటే మరో రూపంలో చేయాలి గానీ ఉచితంగా బియ్యం ఇవ్వకూడదని ఆయన అన్నారు. ప్రభుత్వం రెండు రూపాయల కిలో బియ్యం పథకం అమలును ప్రారంభించగానే కొంత మంది కాంగ్రెస్ నాయకులు అత్యుత్సాహంతో ఉచితంగా బియ్యం పంపిణీ చేయడం మొదలు పెట్టారు.

ఉచితంగా బియ్యం పంపిణీ చేస్తే ప్రజా పంపిణీ వ్యవస్థ ద్వారా అందిస్తున్న రెండు రూపాయల కిలో బియ్యం పథకం పవిత్రత, ఉద్దేశం దెబ్బ తింటాయని ఆయన అన్నారు. పార్టీకి అనుబంధంగా మరిన్ని విభాగాలను ఏర్పాటు చేస్తామని ఆయన చెప్పారు. చురుకుగా పని చేయని జిల్లా కాంగ్రెస్ కమిటీలను (డిసిసిలను) పునర్వ్యస్థీకరిస్తామని ఆయన అన్నారు. అనుబంధ సంస్థల నాయకులతో ఆయన శుక్రవారం సమావేశమయ్యారు. 16 అనుబంధ సంఘాల నాయకులు ఈ సమావేశానికి హాజరయ్యారు.