టిడిపి ఒక్క ప్రాజెక్టు చేపట్టలేదు: వైయస్

కరీంనగర్: తెలుగుదేశం ప్రభుత్వ హయాంలో ఒక్క సాగునీటి ప్రాజెక్టును కూడా చేపట్టలేదని ముఖ్యమంత్రి డాక్టర్ వైయస్ రాజశేఖర రెడ్డి విమర్శించారు. కరీంనగర్ లో జరిగిన బహిరంగ సభలో ఆయన శుక్రవారంనాడు ప్రసంగించారు. తాము ఇచ్చిన హామీలను అన్నింటినీ అమలు చేస్తున్నామని ఆయన చెప్పారు. ఖరీఫ్ కల్లా రైతులకు పావలా వడ్డీకే రుణాలు ఇచ్చే కార్యక్రమాన్ని ప్రారంభిస్తామని ఆయన చెప్పారు.

కరీంనగర్ జిల్లాలో పలు అభివృద్ధి పనులకు ఆయన శ్రీకారం చుట్టారు. ఆరోగ్యశ్రీ పథకాన్ని ప్రారంభించారు. ఈ పథకాన్ని సెప్టెంబర్ నుంచి రాష్ట్రమంతటా అమలు చేస్తామని ఆయన చెప్పారు. శ్రీపాదరావు విగ్రహాన్ని ఆవిష్కరించారు. రాజీవ్ రహదారి ఫోర్ వే లైనుకు శంకుస్థాపన చేశారు. విద్యావాలంటీర్ల జీతాలను మూడు వేల రూపాయలకు పెంచుతున్నట్లు ఆయన తెలిపారు. పేదలకు 60 లక్షల ఇళ్లు నిర్మించామని ఆయన చెప్పారు. పేదలకు పింఛన్లు ఇస్తున్నామని ఆయన అన్నారు.