పురంధరేశ్వరి పాత్ర కూడా..: గోరంట్ల

రాజమండ్రి: పదవి కోసం స్వర్గీయ ఎన్టీ రామారావును కాంగ్రెసుకు తాకట్టు పెట్టవద్దని తెలుగుదేశం పార్టీ ప్రధాన కార్యదర్శి గోరంట్ల బుచ్చయ్యచౌదరి ఎన్టీ రామారావు కూతురు, కేంద్ర మంత్రి దగ్గుబాటి పురంధరేశ్వరికి సలహా ఇచ్చారు. అవినీతిపరుడైన ముఖ్యమంత్రి డాక్టర్ వైయస్ రాజశేఖర రెడ్డిని ఎన్టీఆర్ తో పోల్చడం తగదని ఆయన సోమవారం మీడియా ప్రతినిధులతో అన్నారు. ఎన్టీ రామారావును గద్దె దించడంలో పురంధరేశ్వరి పాత్ర ఏమిటో కూడా ప్రజలందరికీ తెలుసునని ఆయన అన్నారు.

ఎన్టీ రామారావు కుటుంబం కోసం తామంతా బలయ్యామని, పదవుల కోసం పురంధరేశ్వరీ కాంగ్రెసులోకి వెళ్లారని, అందువల్ల ఎన్టీ రామారావు కుటుంబ సభ్యులపై, తెలుగుదేశంపై, ఎన్టీఆర్ పై వ్యాఖ్యలు చేయడం పురంధరేశ్వరికి తగదని ఆయన అన్నారు. పురంధరేశ్వరి అనవసరమైన వివాదాలు సృష్టించడం సరి కాదని ఆయన అన్నారు. రామలాల్ ను అడ్డుపెట్టుకుని కాంగ్రెస్ ఎన్టీ రామారావును ఆభాసుపాలు చేయడానికి ప్రయత్నించిందని, ఆ విషయం పురంధరేశ్వరికి గుర్తు రాకపోవడం విచారకరమని ఆయన అన్నారు.