బాలయ్య ఇంట్లో బాబు, జూ.ఎన్టీఆర్

హైదరాబాద్: తన బావమరిది, సినీ హీరో బాలకృష్ణ ఇంటికి తెలుగుదేశం పార్టీ అధ్యక్షుడు నారా చంద్రబాబునాయుడు సోమవారం విందుకు హాజరయ్యారు. ఇటీవల చంద్రబాబునాయుడు బాలకృష్ణతో పాటు ఎన్టీరామారావు కుటుంబ సభ్యులను తన ఇంటికి ఆహ్వానించి విందు ఇచ్చిన నేపథ్యంలో సోమవారంనాటి బాలకృష్ణ విందుకు ప్రాధాన్యత చేకూరింది. బాలకృష్ణ ఇంట్లో శ్రీరామ నవమి వేడుకలను నిర్వహించారు. ఈ వేడుకల సందర్భంగా చంద్రబాబు విందుకు హాజరయ్యారు.

చంద్రబాబుతో పాటు జూనియర్ ఎన్టీఆర్, ఇతర కుటుంబ సభ్యులు ఈ వేడుకలకు హాజరయ్యారు. దీంతో బాలకృష్ణ ఇంటి ఎదుట పెద్ద యెత్తున మీడియా ప్రతినిధులు గుమికూడారు. తెలుగుదేశం పార్టీని తిరిగి అధికారంలోకి తీసుకురావడానికి ఎన్టీ రామారావు కుటుంబ సభ్యులంతా ఏకమవుతున్నారనే వార్తలు వెలువడుతున్న నేపథ్యంలో అతి కొద్ది కాలంలోనే వీరి రెండో భేటీకి రాజకీయ ప్రాధాన్యం చేకూరిందని అంటున్నారు.