వైభవంగా సీతారాముల కళ్యాణం

భద్రాచలం: ఖమ్మం జిల్లా భద్రాచలంలో సీతారాముల కళ్యాణం సోమవారం వైభవంగా జరిగింది. రాష్ట్ర ప్రభుత్వం తరఫున ముఖ్యమంత్రి డాక్టర్ వైయస్ రాజశేఖర రెడ్డి పట్టు వస్త్రాలు, ముత్యాల తలంబ్రాలు సమర్పించారు. ఆయన శ్రీరాముడి దర్శనం చేసుకున్నారు. దేవాదాయ శాఖ మంత్రి రత్నాకర్ రావు కూడా ఈ కార్యక్రమానికి హాజరయ్యారు. సీతారాముల కళ్యాణాన్ని కనులారా చూడడానికి తండోపతండాలుగా భక్తులు విచ్చేశారు.

తిరుమల తిరుపతి దేవస్థానం (టిటిడి) పట్టు వస్త్రాలను సమర్పించింది. లక్షలాది మంది భక్తులు భద్రాద్రి కళ్యాణ మహోత్సవాన్ని తిలకించారు. ఇందుకు భద్రాచలంలో విస్తృతమైన ఏర్పాట్లు చేశారు. రాష్ట్ర ప్రజలకు ముఖ్యమంత్రి శ్రీరామనవమి శుభాకాంక్షలు తెలియజేశారు. శ్రీరామనవమి సందర్భంగా రాష్ట్రంలోని దేవాలయాలు భక్తులతో కిటకిటలాడాయి. రాష్ట్ర ప్రజలు ఈ పర్వదినాన్ని ఆనందోత్సాహాల మధ్య జరుపుకున్నారు.