వైయస్ పై వెంకయ్య మండిపాటు

నెల్లూరు: రెండు రూపాయలకు కిలో బియ్యం పథకంపై ప్రతిపక్ష నాయకుడు నారా చంద్రబాబునాయుడుకు ముఖ్యమంత్రి డాక్టర్ వైయస్ రాజశేఖర రెడ్డి బహిరంగ లేఖ రాయడంపై భారతీయ జనతా పార్టీ (బిజెపి) నాయకుడు ఎం. వెంకయ్యనాయుడు మండిపడ్డారు. అధికారంలోకి వచ్చిన నాలుగేళ్ల తర్వాత ముఖ్యమంత్రికి పేదలు గుర్తొచ్చారా అని ఆయన ప్రశ్నించారు. ఎన్నికల సమయంలో రెండు రూపాయలకు కిలో బియ్యం పథకాన్ని ప్రవేశపెట్టడమేమిటని ఆయన సోమవారం మీడియా ప్రతినిధులతో అన్నారు.

రెండు రూపాయలకు కిలో బియ్యం పథకాన్ని పార్టీ పరంగా, పార్టీ నాయకుల చేత మొదలు పెట్టించిన ముఖ్యమంత్రి పార్టీకి, ప్రభుత్వానికి మధ్య ఉండాల్సిన అంతరాన్ని కాలరాశారని ఆయన విమర్శించారు. ఇప్పుడు విమర్శలు వచ్చే సరికి ప్రతిపక్షాలను కలిసి రావాలని అంటున్నారని ఆయన అన్నారు. రెండు రూపాయలకు కిలో బియ్యం పథకాన్ని రాజకీయం చేయడం వల్ల ముఖ్యమంత్రి చిత్తశుద్ధిని శంకించాల్సి వస్తోందని ఆయన అన్నారు. ఈ పథకం అమలు కోసం అఖిల పక్ష కమిటీలను వేసి ప్రతిపక్షాల ప్రజాప్రతినిధులను భాగస్వాములను చేయాల్సి ఉందని ఆయన అన్నారు.