తెలంగాణకు వ్యతిరేకం కాను: డిఎస్

హైదరాబాద్: తెలంగాణకు తాను వ్యతిరేకం కానని ప్రదేశ్ కాంగ్రెస్ కమిటీ (పిసిసి) అధ్యక్షుడు డి. శ్రీనివాస్ చెప్పారు. పిసిసి పదవి తనకు రావడం ఆశ్చర్యం కలిగించిందని ఆయన మంగళవారం మీట్ ది ప్రెస్ కార్యక్రమంలో అన్నారు. పిసిసి అధ్యక్ష పదవిని తాను ఆశించలేదని, రెండో సారి ఆ పదవి రావడం ఆశ్చర్యం కలిగిస్తోందని ఆయన అన్నారు. పార్టీలో ఐక్యత సాధించడమే తన ముందున్న ప్రథమ లక్ష్యమని ఆయన అన్నారు. రాహుల్ గాంధీ ప్రధాని అయితే సంతోషిస్తానని ఆయన చెప్పారు. పిసిసి అధ్యక్షుడిగా తన కార్యక్రమాలను ఈ రోజే ప్రారంభించానని ఆయన చెప్పారు. ప్రజల అభిప్రాయాలను తెలుసుకుని అందుకు అనుగుణంగా నడుచుంటామని ఆయన చెప్పారు. కాంగ్రెసును భూస్థాపితం చేయడం ఎవరి వల్లా కాదని ఆయన అన్నారు.

రెండు రూపాయల కిలో బియ్యం పథకం ప్రారంభించడం అనూహ్యమని ఆయన అన్నారు. తాము రెండు రూపాయలకు కిలో బియ్యం పథకాన్ని ప్రారంభించిన తర్వాత ఉచితంగా బియ్యం ఇస్తామని ఇతర పార్టీలు అనడం దురదృష్టకరమని ఆయన అన్నారు. జిల్లా కాంగ్రెస్ కమిటీల, నగర కమిటీ పనితీరును పరిశీలిస్తానని ఆయన చెప్పారు. తనకు మీడియా సహకారం అందించాలని ఆయన కోరారు. కాంగ్రెస్ అధికారంలో కొనసాగడానికి తన వంతు కృషి చేస్తానని ఆయన చెప్పారు.