ఇంటింటా దౌర్భాగ్యం: కెసిఆర్

నల్లగొండ: ఇందిరమ్మ రాజ్యం ఇంటింటా దౌర్భాగ్యమని తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు వ్యాఖ్యానించారు. నల్లగొండ జిల్లా వర్టూరు గ్రామంలో ఆయన మంగళవారంనాడు దళితులతో సహపంక్తి భోజనం చేశారు. ముఖ్యమంత్రి డాక్టర్ వైయస్ రాజశేఖర రెడ్డి పాలనలో పేదరికం రాజ్యమేలుతోందని ఆయన అన్నారు. దళితులు నిధులను ఇతర కార్యక్రమాలకు మళ్లిస్తున్న ముఖ్యమంత్రిపై క్రిమినల్ కేసు పెట్టాలని ఆయన అన్నారు.

అనంతరం ఆయన నల్లగొండ జిల్లాలోని జియాపల్లిలోని వక్ఫ్ భూములను పరిశీలించారు. ఆ భూములను ప్రభుత్వం స్వాధీనం చేసుకుని కాపాడాలని, లేకుంటే ఆందోళనకు దిగుతామని ఆయన చెప్పారు. ఈ నెల 27వ తేదీన పార్టీ ఆవిర్భావ దినోత్సవ కార్యక్రమానికి నిధుల సేకరణ కోసం కెసిఆర్ కూలీ పని చేయనున్నారు. రంగారెడ్డి జిల్లాలోని కుత్బుల్లాపూర్ మండలం మైసమ్మగండి వద్ద ఆయన కూలీ పని చేస్తారు. సిమెంటు, కాంక్రీట్ మిక్స్ లో ఆయన పని చేస్తారు. అలాగే టూత్ పేస్టుల కంపెనీలో పనిచేస్తారు. మొబైల్ షాపులో సేల్స్ మన్ గా పనిచేస్తారు. తెరాస నాయకులు రేపు, ఎల్లుండి కూలీపనులు చేస్తారు.