చిరు వర్సెస్ బాలయ్య తప్పు: హరికృష్ణ

న్యూఢిల్లీ: చిరంజీవి వర్సెస్ బాలకృష్ణ అనడం సరి కాదని తెలుగుదేశం పార్టీ రాజ్యసభ సభ్యుడు, స్వర్గీయ ఎన్టీరామారావు కుమారుడు హరికృష్ణ అన్నారు. వయస్సును పరిగణనలోకి తీసుకుని చిరంజీవికి బాలకృష్ణ, జూనియర్ ఎన్టీఆర్ కు పవన్ కళ్యాణ్ పోటీ అని ప్రచారం చేస్తున్నారని, ఇది సరి కాదని, ఇదంతా మీడియా కల్పిస్తున్నదేనని ఆయన మంగళవారం ఒక ప్రైవేట్ టీవీ చానెల్ ప్రతినిధితో అన్నారు. చిరంజీవి రాజకీయ రంగ ప్రవేశంపై ఇంకా అధికారిక ప్రకటన వెలువడలేదని, మీడియానే ఊహాగానాలు ప్రచారం చేస్తోందని, అయితే ఎవరైనా తీర్పు చెప్పేది ప్రజలేనని ఆయన అన్నారు. పార్టీలో ఎవరిని ఏ విధంగా ఉపయోగించుకోవాలనే విషయంపై తమ పార్టీ అధినేత నారా చంద్రబాబునాయుడు నిర్ణయం తీసుకుంటారని ఆయన అన్నారు.

తెలుగుదేశం పార్టీ కోసం నందమూరి వంశం పనిచేస్తుందని ఆయన చెప్పారు. ఎన్టీ రామారావు మనవళ్లు కూడా తెలుగుదేశం పార్టీ కోసం పని చేస్తారని ఆయన చెప్పారు. తన సోదరి పురంధరేశ్వరి వ్యాఖ్యలను ఆమె విజ్ఞతకే వదిలేస్తున్నామని ఆయన చెప్పారు. తమ సోదరి పురంధరేశ్వరిని ఒక అయ్య (దగ్గుబాటి వెంకటేశ్వరరావు) చేతిలో పెట్టామని, ఆమె ఆ అయ్య చెప్పినట్లు వినాల్సిందేనని ఆయన అన్నారు. ఎన్టీ రామారావును కాంగ్రెస్ పార్టీ ఎలా ఇబ్బందులకు గురి చేసిందో అందరికీ తెలుసునని, కాంగ్రెసును ఎన్టీరామారావు తరిమి కొట్టారని, ఎన్టీ రామారావు రక్తాన్ని పంచుకుని పుట్టామని, అందువల్ల ఎన్టీ రామారావు ఆశయాల సాధనకు కృషి చేస్తామని ఆయన చెప్పారు.