రాహుల్ ఫ్లాప్: వెంకయ్యనాయుడు

జైపూర్: అమేధీ పార్లమెంటు సభ్యుడు, ఎఐసిసి అధ్యక్షురాలు సోనియా గాంధీ కుమారుడు రాహుల్ గాంధీని కొందరు కాంగ్రెస్ నాయకులు, కొందరు యుపిఎ నాయకులు ప్రధాని అభ్యర్థిగా చూపించడాన్ని భారతీయ జనతా పార్టీ (బిజెపి) సీనియర్ నాయకుడు ఎం. వెంకయ్యనాయుడు అవహేళన చేశారు. రాహుల్ గాంధీని ప్రధాని అభ్యర్థిగా ముందుకు తేవడం వల్ల ఒరిగేదేమీ లేదని ఆయన అన్నారు. పార్టీ కార్యకర్తల ధర్నా శిబిరంలో ఆయన మంగళవారంనాడు ప్రసంగించారు.

రాహుల్ గాంధీ ప్రధాని అయితే ఏదో జరుగుతుందని కొంత మంది అంటున్నారని, ఏం ఒనగూరుతుందనేది తనకు ఏ మాత్రం అర్థం కావడం లేదని ఆయన అన్నారు. తన తల్లి సోనియా గాంధీ మాదిరిగానే రాహుల్ గాంధీ కూడా విఫలమయ్యారని, మొదట ఉత్తరప్రదేశ్ లో ఆ తర్వాత గుజరాత్ లో రాహుల్ ఫ్లాప్ అయ్యారని ఆయన వ్యాఖ్యానించారు. గుజరాత్ లో తల్లీకొడుకులిద్దరూ విఫలమయ్యారని ఆయన అన్నారు. గత నాలుగేళ్లలో 12 రాష్ట్రాలకు ఎన్నికలకు జరిగితే పది రాష్ట్రాల్లో కాంగ్రెస్ ఓడిపోయిందని ఆయన చెప్పారు. కర్ణాటక ఎన్నికల్లోనూ కాంగ్రెస్ ఓడిపోతుందని ఆయన జోస్యం చెప్పారు.