తెలంగాణ భవితవ్యం తేలదు: వెంకయ్య

విజయవాడ: రాష్ట్రంలో జరిగే ఉప ఎన్నికలు తెలంగాణ భవితవ్యాన్ని తేల్చబోవని భారతీయ జనతా పార్టీ (బిజెపి) సీనియర్ నాయకుడు ఎం. వెంకయ్యనాయుడు అన్నారు. ఎన్నికల్లో ఏ పార్టీతోనూ పొత్తు ఉండకపోవచ్చునని ఆయన గురువారం మీడియా ప్రతినిధులతో అన్నారు. సిపిఐ ప్రభుత్వ వ్యతిరేక ఆందోళనలు ఎవరి కోసమని ఆయన ప్రశ్నించారు. వామపక్షాల తాపత్రయం ప్రజా సంక్షేమం కోసమా, అధికారం కోసమా అని ఆయన అడిగారు.

రెండు రూపాయలకు కిలో బియ్యం పథకాన్ని రాజకీయం చేసింది ముఖ్యమంత్రి డాక్టర్ వైయస్ రాజశేఖర రెడ్డేనని ఆయన విమర్శించారు. పప్పులు, నూనెలు, వంటగ్యాస్ ధరలు కలుపుకుంటే బియ్యం ధర కిలోకు 20 రూపాయల పైనే అవుతుందని ఆయన అన్నారు. ఇదంతా ముఖ్యమంత్రి అసమర్థత వల్లనే జరుగుతోందని ఆయన అభిప్రాయపడ్డారు.