మాహారాష్ట్రపై కోర్టు ధిక్కారం కేసు: పొన్నాల

కరీంనగర్: గోదావరి నదిపై మహారాష్ట్ర ప్రభుత్వం అక్రమంగా నిర్మిస్తున్న బాబ్లీ ప్రాజెక్టును అడ్డుకుంటామని రాష్ట్ర భారీ నీటి పారుదల శాఖ మంత్రి పొన్నాల లక్ష్మయ్య చెప్పారు. సుప్రీంకోర్టు తీర్పును ధిక్కరించి మహారాష్ట్ర ప్రభుత్వం ఈ ప్రాజెక్టును నిర్మిస్తోందని ఆయన శుక్రవారం మీడియా ప్రతినిధులతో అన్నారు. మహారాష్ట్ర ప్రభుత్వంపై కోర్టు ధిక్కారం కేసు వేస్తామని, ఈ విషయంపై తాము ఇప్పటికే నిపుణులతో మాట్లాడామని ఆయన చెప్పారు.

మహారాష్ట్ర ప్రభుత్వం అత్యుత్సాహం ప్రదర్శిస్తూ 11 ప్రాజెక్టులు నిర్మిస్తోందని ఆయన అన్నారు. ఈ విషయాన్ని తాము కేంద్ర ప్రభుత్వం దృష్టికి, కేంద్ర జలవనరుల సంఘం దృష్టికి తీసుకుని వెళ్తామని ఆయన చెప్పారు. ఎల్లంపల్లి ప్రాజెక్టు నుంచి హైదరాబాదుకు పది టిఎంసిల నీటిని తరలిస్తారా అని అడిగితే అది తన పరిధిలో లేదని మెట్రోపాలిటన్ వాటర్ వర్క్స్ వాళ్లు దాన్ని చూసుకుంటున్నారని ఆయన అన్నారు. బాబ్లీ ప్రాజెక్టు నిర్మాణాన్ని మహారాష్ట్ర ప్రభుత్వం కొనసాగిస్తోందని తెలుగుదేశం పార్టీ ఇటీవల బయటపెట్టిన విషయం తెలిసిందే.