ఉప ఎన్నికల్లో సత్తా చాటుతాం: టిడిపి

హైదరాబాద్: ఉప ఎన్నికల్లో తమ సత్తా చాటుతామని తెలుగుదేశం పార్టీ నాయకులు అంటున్నారు. తెలుగుదేశం పార్టీ పొలిట్ బ్యూరో శుక్రవారంనాడు పార్టీ అధ్యక్షుడు నారా చంద్రబాబునాయుడు నివాసంలో సమావేశమై ఉప ఎన్నికల్లో అనుసరించాల్సిన వ్యూహంపై, ఈ నెల 21వ తేదీ నుంచి తలపెట్టిన చంద్రబాబు రథయాత్రపై చర్చించింది. కాంగ్రెస్, తెలంగాణ రాష్ట్ర సమితి ప్రజలకు ఇచ్చిన హామీలను నెరవేర్చలేకపోయాయని తెలుగుదేశం విమర్శించింది.

చంద్రబాబు తలపెట్టిన రథయాత్రలో ఏ విధమైన మార్పులు ఉండవని తెలుగుదేశం నాయకులు స్పష్టం చేశారు. గుంటూరు జిల్లా నుంచి నల్లగొండ జిల్లాలోకి ప్రవేశించిన తర్వాత ఆయన పర్యటనలో స్వల్ప మార్పులుంటాయని వారు చెప్పారు. మే 29వ తేదీన తెలంగాణలోని 19 నియోజకవర్గాల్లో ఉప ఎన్నికలకు పోలింగ్ జరగనున్న విషయం తెలిసిందే.