తెలంగాణ సెంటిమెంటు ఉంది: రాఘవులు

హైదరాబాద్: ఉప ఎన్నికల్లో కాంగ్రెసుతో పొత్తు పెట్టుకునే ప్రసక్తే లేదని సిపియం రాష్ట్ర కార్యదర్శి బి.వి. రాఘవులు స్పష్టం చేశారు. ఉప ఎన్నికల్లో తెలంగాణ సెంటిమెంటు, ధరల పెరుగుదల ప్రభావం చూపుతాయని ఆయన శుక్రవారం ఒక ప్రైవేట్ తెలుగు టీవీ చానెల్ కు ఇచ్చిన ఇంటర్వ్యూలో అభిప్రాయపడ్డారు. ఉప ఎన్నికల్లో పొత్తుపై తాము ఇంకా తెలుగుదేశం పార్టీ నాయకులతో చర్చించలేదని ఆయన అన్నారు. ఉప ఎన్నికల విషయంపై తాము ముందు సిపిఐతో మాట్లాడాల్సి ఉందని, వామపక్షాల ఐక్యత ముఖ్యమని ఆయన అన్నారు.

కాంగ్రెస్, బిజెపిలను ఓడించడమే తమ లక్ష్యమని ఆయన చెప్పారు. ఉప ఎన్నికల్లో అనుసరించాల్సిన వ్యూపంపై తాము ఇది వరకే ఒక దశ సిపిఐ నాయకులతో చర్చలు జరిపామని, సిపిఐ కార్యవర్గ సమావేశాల తర్వాత మళ్లీ సిపిఐతో చర్చిస్తామని, ఒక ఉమ్మడి అవగాహనకు వచ్చిన తర్వాత పొత్తుల విషయంలో ఇతర పార్టీలతో మాట్లాడుతామని ఆయన చెప్పారు. ఒక ఉమ్మడి ఫ్రంట్ పెట్టడానికి ముందుకు రావాలని లోకసత్తా నాయకుడు జయప్రకాశ్ నారాయణ ఒక లేఖ రాశారని, ఈ విషయంపై తాము కేంద్ర కమిటీని సంప్రదించాల్సి ఉందని, ఆ తర్వాతే నిర్ణయం తీసుకుంటామని ఆయన చెప్పారు.