వైయస్, బాబు తెలంగాణ రాగం

హైదరాబాద్: తెలంగాణలో ఉప ఎన్నికల నగారా మోగడంతో ఇటు ముఖ్యమంత్రి డాక్టర్ వైయస్ రాజశేఖర రెడ్డి, అటు తెలుగుదేశం పార్టీ అధ్యక్షుడు నారా చంద్రబాబునాయుడు తాము తెలంగాణకు వ్యతిరేకం కాదని చెప్పుకున్నారు. తన యాత్రలో తెలంగాణ అంశాన్ని చర్చనీయాంశం చేస్తానని చంద్రబాబు గురువారం మీడియా ప్రతినిధులతో చెప్పారు. మెజారిటీ ప్రజల అభిప్రాయం మేరకు తెలంగాణపై నిర్ణయం తీసుకుంటామని ఆయన చెప్పారు. కొన్ని ప్రాంతాల్లో ప్రత్యేక రాష్ట్రం కావాలంటున్నారని, మరికొన్ని ప్రాంతాల్లో సమైక్యాంధ్ర అంటున్నారని, ఈ అంశంపై ఏ పార్టీ నాయకుడు ఎప్పుడు ఏ విధంగా మాట్లాడాడన్నది చర్చకు పెట్టాలని ఆయన అన్నారు. ఉప ఎన్నికల లోపు తెలంగాణ అంశాన్ని తేల్చలేమని, సమయం సరిపోదని ఆయన అన్నారు. తెలంగాణపై తాము వేసిన కమిటీ నిర్ణయం తీసుకుంటుందని, ఇది విస్తృతమైన ప్రక్రియ అని ఆయన అన్నారు.

తమ ప్రభుత్వం ప్రత్యేక తెలంగాణకు వ్యతిరేకం కాదని ముఖ్యమంత్రి వైఎస్ వెల్లడించారు. తెలంగాణ అంశాన్ని పక్కన పెట్టేయలేదని దానిపై చర్చలు జరుగుతున్నాయని ఆయన అన్నారు. గురువారం జరిగిన మంత్రివర్గ సమావేశం పూర్తయిన అనంతరం ఆయన మంత్రులతో మాట్లాడారు. ఈ సందర్భంగా తెలంగాణ ప్రాంతంలో అభివృద్ధి కార్యక్రమాలను చేపడుతున్నట్టు చెప్పారు. ఆ ప్రాంతంలో సాగునీటి పథకాలకు నిధులను విడుదల చేసే అంశాలను పరిశీలిస్తున్నట్టు తెలిపారు. తెలంగాణకు సంబంధించి పార్టీ వర్గాల్లో గందరగోళం ఏర్పడిందని ఆయన అన్నారు. అలాగే లోక్‌సభ ఎన్నికల్లో పార్టీకి తగిన మెజారిటీని సాధించేందుకు స్థానిక ఎమ్మెల్యేలు, నేతలు బాధ్యత తీసుకోవాలని పిలుపునిచ్చారు.