కడియం శ్రీహరిపై బాబు గరం

చిత్తూరు: తెలంగాణపై పార్టీ వైఖరి విషయంలో వ్యాఖ్యలు చేసిన పార్టీ నాయకుడు కడియం శ్రీహరిపై తెలుగుదేశం పార్టీ అధ్యక్షుడు నారా చంద్రబాబునాయుడు తీవ్ర ఆగ్రహం వ్యక్తం చేసినట్లు సమాచారం. మీ కోసం చైతన్య యాత్ర ప్రారంభానికి ముందు జరిగిన పోలిట్ బ్యూరో సమావేశంలో ఈ విషయం ప్రస్తావనకు వచ్చింది. పార్టీ నుంచి వెళ్లిపోయే ఉద్దేశంతోనే కడియం శ్రీహరి తెలంగాణ విషయంలో పార్టీ వైఖరిపై ఎప్పటికప్పుడు విమర్శలు చేస్తున్నారని సమావేశంలో ఒక నాయకుడు చెప్పినట్లు సమాచారం. దీంతో కడియం శ్రీహరిపై చంద్రబాబుపై మండిపడినట్లు తెలుస్తోంది.

కాగా, ఉప ఎన్నికలకు ఈ సాయంత్రం అభ్యర్థుల జాబితాను విడుదల చేయాల్సి ఉండగా దాన్ని పార్టీ వాయిదా వేసుకుంది. స్టేషన్ ఘనపూర్ నుంచి పోటీ చేయాల్సిన కడియం శ్రీహరి పార్టీపై విమర్శలు చేయడం తదితర సమస్యల దృష్ట్యా జాబితా విడుదలను వాయిదా వేసింది. నల్లగొండ జిల్లాకు చెందిన గుత్తా సుఖేందర్ రెడ్డి చేసిన వ్యాఖ్యలు, ఆలేరు శాసనసభా నియోజకవర్గం నుంచి పోటీ చేయడానికి మోత్కుపల్లి నర్సింహులు విముఖత వ్యక్తం చేయడం వంటి కారణాలు జాబితా విడుదల వాయిదాకు కారణాలు. వరంగల్, హన్మకొండ పార్లమెంటు నియోజకవర్గాలకు ఇంకా అభ్యర్థులు ఖరారు లేదు.