చంద్రబాబు రథసారథి హరికృష్ణ

చిత్తూరు: మీ కోసం చైతన్య యాత్రలో తెలుగుదేశం పార్టీ అధ్యక్షుడు నారా చంద్రబాబునాయుడు రథసారథిగా రాజ్యసభ సభ్యుడు, స్వర్గీయ ఎన్టీ రామారావు కుమారుడు నందమూరి హరికృష్ణ వ్యవహరించనున్నారు. ఎన్టీ రామారావు రథసారథిగా హరికృష్ణ వ్యవహరించిన విషయం తెలిసిందే. చంద్రబాబు మీ కోసం రథ యాత్ర సోమవారం ఉదయం చంద్రగిరిలోని దళితవాడు నుంచి ప్రారంభమైంది. అంతకు ముందు ఆయన తిరమలలోని శ్రీవెంకటేశ్వరస్వామిని దర్శించుకున్నారు. ఆయనకు తిరుమల తిరుపతి దేవస్థానం ఎగ్జిక్యూటివ్ అధికారి ధర్మారెడ్డి స్వాగతం చెప్పకపోవడంపై తెలుగుదేశం పార్టీ నాయకులు మండిపడ్డారు. ప్రోటోకాల్ పాటించలేదని వారు విమర్శించారు.

ఆదివారం ఉదయం తన స్వగ్రామం నారావారిపల్లెలో చంద్రబాబు తన జన్మదిన వేడుకలను జరుపుకున్నారు. సోమవారం ఉదయం ఆయన తన రథయాత్రను ప్రారంభించారు. అంతకు ముందు తెలుగుదేశం పార్టీ పోలిట్ బ్యూరో సమావేశం జరిగింది. ఉప ఎన్నికల్లో పోటీ చేసే పార్టీ అభ్యర్థుల జాబితాను సోమవారం సాయంత్రం వెల్లడించే అవకాశం ఉంది. చంద్రబాబు రోజుకు 70 కిలోమీటర్లు చొప్పున వంద రోజులు రాష్ట్రంలోని 7 వేల కిలోమీటర్లు తిరుగుతారు. తొలుత ప్రకాశం, నెల్లూరు, గుంటూరు జిల్లాలో పర్యటిస్తారు. గుంటూరు జిల్లా నుంచి ఆయన నల్లగొండ జిల్లాలోకి ప్రవేశిస్తారు. ఉప ఎన్నికలు జరిగే అన్ని ప్రాంతాల్లో ఆయన పర్యటిస్తారు.