అణు ఒప్పందంపై అభిప్రాయం: ప్రణభ్

న్యూఢిల్లీ : అమెరికా కాంగ్రెస్‌లోకి పౌర అణు ఒప్పందాన్ని ఆమోదం కోసం ప్రవేశపెట్టే ముందు దానిపై భారత పార్లమెంట్‌ అభిప్రాయాన్ని కూడా కోరతామని విదేశాంగ మంత్రి ప్రణబ్ ముఖర్జీ తెలిపారు. వాస్తవానికి అణు ఒప్పందాన్ని అమల్లోకి తెచ్చేందుకు ఎటువంటి అడ్డంకులు లేవని ప్రణబ్ ముఖర్జీ చెప్పారు.

అణు ఒప్పందంలోని మూడంచెల ప్రక్రియ పూర్యయ్యాక పార్లమెంట్ అభిప్రాయాన్ని కోరతామని తెలిపారు. మొదటి ప్రక్రియ 123 ఒప్పందం. దీనిని అమెరికా, భారత్ ఇప్పటికే పూర్తి చేశాయి. రెండో దశలో అంతర్జాతీయ అణు శక్తి సంస్థతో భద్రతా చర్యల ఒప్పందం కుదుర్చుకోవాలి. ఈ ప్రక్రియ పూర్తి చేయాల్సి ఉందని ప్రణబ్ వెల్లడించారు.

మూడో దశలో అణు ఇంధన సరఫరా దేశాలతో చర్చల ద్వారా మార్గదర్శకాలు సవరించడమని ప్రణబ్ తెలిపారు. ఈ మూడు దశలు పూర్తయిన అనంతరం అణు ఒప్పందంపై పార్లమెంట్ అభిప్రాయాన్ని కోరతామని అన్నారు.

ఈ ఒప్పందాన్ని పార్లమెంట్‌లో ప్రవేశపెడితే మెజారిటీ సభ్యులు దీనిని సమర్థిస్తారని తాను చెప్పడం లేదన్నారు. ఒప్పందం అమల్లోకి వస్తేనే దాని ప్రయోజనాలు తెలుస్తాయని చెప్పారు. ఈ ఒప్పందం వలన భారత స్వతంత్ర విదేశాంగ విధానానికి ముప్పేమీ లేదని స్పష్టం చేశారు.