ఢిల్లీకి వైయస్ చక్కర్లు: బాబు

ఒంగోలు: ప్రజలు నిత్యావసర ధరల పెరుగుదలతో సతమవుతుంటే ముఖ్యమంత్రి డాక్టర్ వైయస్ రాజశేఖర రెడ్డి ఢిల్లీకి చక్కర్లు కొడుతున్నారని తెలుగుదేశం పార్టీ అధ్యక్షుడు నారా చంద్రబాబునాయుడు విమర్శించారు. మీ కోసం రథయాత్ర ఐదో రోజు శుక్రవారం ప్రకాశం జిల్లాలో సాగుతోంది. పామూరు నుంచి ఆయన శుక్రవారం తన యాత్రను ప్రారంభించారు. నిత్యావసర సరుకుల ధరల పెరుగుదల వల్ల పన్ను వస్తుందని ప్రభుత్వం వస్తుందని ఆనందపడుతోందని ఆయన వ్యాఖ్యానించారు. నీళ్లు లేక బోర్లు ఎండిపోతుంటే తాగండని చెప్పి బెల్టు షాపుల ద్వారా మద్యాన్ని ప్రవహింపజేస్తోందని ఆయన అన్నారు.

తెలంగాణ ఉప ఎన్నికల్లో తమ పార్టీ గెలుస్తుందని ఆయన ధీమా వ్యక్తం చేశారు. తెలంగాణ ప్రజల్లో తమ పార్టీకి విశ్వసనీయత ఉందని ఆయన చెప్పారు. తెలంగాణపై తాము వేసిన ఐదుగురు సభ్యుల కమిటీ నివేదిక ఇవ్వగానే తగిన నిర్ణయం తీసుకుంటామని ఆయన ఒక ప్రైవేట్ తెలుగు టీవీ చానెల్ కు ఇచ్చిన ఇంటర్వ్యూలో చెప్పారు. ముఖ్యమంత్రి డాక్టర్ వైయస్ రాజశేఖర రెడ్డి ప్రాంతీయ విద్వేషాలు రెచ్చగొడుతున్నారని ఆయన విమర్శించారు. కేంద్ర ప్రభుత్వం ప్రకటించిన రుణమాఫీ పథకం లోపభూయిష్టంగా ఉందని ఆయన అన్నారు. తాము అధికారంలోకి వస్తే రైతుల రుణాలను అన్నింటినీ రద్దు చేస్తామని ఆయన చెప్పారు.