వాస్తుపై డిఎస్ విశ్వాసం

విశాఖపట్నం: ప్రదేశ్ కాంగ్రెస్ కమిటీ (పిసిసి) అధ్యక్షుడు డి. శ్రీనివాస్ కు వాస్తుపై ఎనలేని విశ్వాసం ఉందనే విషయం శుక్రవారంనాడు బయటపడింది. ఈ విషయాన్ని ఆయన స్వయంగా వెల్లడించారు. వాస్తుపై నమ్మకంతోనే తాను ఉత్తరాంధ్ర నుంచి ప్రచారం మొదలు పెట్టానని ఆయన మీడియా ప్రతినిధులతో చెప్పారు. విజయనగరం జిల్లా తెర్లాం నియోజకవర్గం నుంచి ఆయన శుక్రవారం ప్రచారాన్ని ప్రారంభించారు. తెర్లాం శాసనసభా నియోజకవర్గానికి ఉప ఎన్నిక జరుగుతున్న విషయం తెలిసిందే.

గత ఎన్నికల్లో తాను పార్వతీపురం నుంచి ప్రచారం ప్రారంభించానని, ఇప్పుడు విజయనగరం నుంచి మొదలు పెట్టానని, ఇది సెంటిమెంటు అని, వాస్తుపై నమ్మకంతోనే అలా చేశానని ఆయన వివరించారు. గత ఎన్నికల్లో కాంగ్రెసు పార్టీ రాష్ట్రంలో ఘన విజయం సాధించిన విషయం తెలిసిందే. ఆ సమయంలో శ్రీనివాసే పిసిసి అధ్యక్షుడిగా ఉన్నారు. ముఖ్యమంత్రి డాక్టర్ వైయస్ రాజశేఖర రెడ్డితో సమన్వయంతో పని చేస్తానని ఆయన చెప్పారు.