కెసిఆర్ జవాబుదారీ: నారాయణ

నల్లగొండ: తెలంగాణలో వచ్చిన ఉప ఎన్నికలు శుద్ధ దండుగ అని సిపిఐ రాష్ట్ర కార్యదర్శి కె. నారాయణ వ్యాఖ్యానించారు. సిపిఐ రాష్ట్ర సమితి సమావేశాలు శుక్రవారం నాగార్జునసాగరులో ప్రారంభమయ్యాయి. ఈ సందర్భంగా ఆయన మీడియా ప్రతినిధులతో మాట్లాడారు. ఉప ఎన్నికల వల్ల రాష్ట్రానికి గానీ ప్రజలకు గానీ ఒరిగే ప్రయోజనమేమీ లేదని ఆయన అన్నారు. దీనికి తెలంగాణ రాష్ట్ర సమితి అధ్యక్షుడు కె. చంద్రశేఖరరావు సమాధానం చెప్పాలని ఆయన అన్నారు. ఉప ఎన్నికల్లో పెట్టుకోవాల్సిన పొత్తులే రాష్ట్ర సమితి సమావేశంలో ప్రధాన ఎజెండా కానుంది.

ఉప ఎన్నికల్లో మేడారం, హుజూరాబాద్, స్టేషన్ ఘనపూర్, ఆలేరు నియోజకవర్గాల నుంచి పోటీ చేసే విషయాన్ని సమావేశంలో చర్చిస్తామని ఆయన చెప్పారు. వామపక్షాల మధ్య ఐక్యతే ప్రధాన అంశంగా ఈ నెల 27వ తేదీన సిపిఎంతో చర్చిస్తామని ఆయన చెప్పారు. నిత్యావసర సరుకుల ధరల పెరుగుదల, భూపోరాటం, సిమెంటు స్టీలు ధరల పెరుగుదల అంశాలపై చర్చిస్తామని, పోరాటాలకు రూపకల్పన చేస్తామని ఆయన చెప్పారు. తాము ప్రత్యేక తెలంగాణకు వ్యతిరేకం కాదని, అయితే దీనిపై కేంద్రం నిర్ణయం తీసుకోవాల్సి ఉంటుందని ఆయన అన్నారు.