బాబుది నయవంచన: వైయస్

హైదరాబాద్: తెలుగుదేశం పార్టీ అధ్యక్షుడు నారా చంద్రబాబునాయుడు నయవంచనకు పాల్పడుతున్నారని ముఖ్యమంత్రి డాక్టర్ వైయస్ రాజశేఖర రెడ్డి విమర్శించారు. కాంగ్రెస్ గ్రేటర్ హైదరాబాద్ అధ్యక్షుడు దానం నాగేందర్ ఆధ్వర్యంలో ఎస్సీ, ఎస్టీ, బిసిలు కొంత మంది ముఖ్యమంత్రి సమక్షంలో శుక్రవార కాంగ్రెసులో చేరారు. ఈ సందర్భంగా ముఖ్యమంత్రి వారిని ఉద్దేశించి మాట్లాడారు. నిరుద్యోగులకు నెలకు వేయి రూపాయల చొప్పున భృతి ఇస్తామని చంద్రబాబు ఇచ్చిన హామీపై ఆయన విరుచుకుపడ్డారు.

తొమ్మిదేళ్ల పాలనలో గుర్తుకు రాని చంద్రబాబుకు ఇప్పుడు నిరుద్యోగులు గుర్తుకు వచ్చారా అని ఆయన అడిగారు. తొమ్మిదేళ్ల పాలనలో చేయని పనులు మళ్లీ అధికారంలోకి వస్తే చేస్తానని చంద్రబాబు చెప్పే మాటలను ఎవరూ నమ్మరని, చంద్రబాబు మాటలకు విశ్వసనీయత లేదని ఆయన అన్నారు. చంద్రబాబు ఇంతకు ముందు ఒక్క మాటను కూడా నిలబెట్టుకోలేదని ఆయన విమర్శించారు.