జైలు కెళ్లేందుకైనా రెడీః బాబు

గుంటూరు: పార్టీ కార్యకర్తలను కాపాడుకునేందుకై జైలుకెళ్లేందుకైనా తాను సిద్ధంగా ఉన్నానని తెలుగుదేశం పార్టీ అధ్యక్షుడు చంద్రబాబు నాయుడు అన్నారు. కాంగ్రెస్ పాలనలో రౌడీ రాజ్యం సాగుతున్నందున దాన్ని ఎదుర్కునేందుకు అన్ని విధాలా సిద్ధమవుతున్నామని చెప్పారు. చంద్రబాబు మీ కోసం యాత్ర గురువారంనాడు గుంటూరు జిల్లాలో సాగింది. వారిని కాపాడుకునేందుకై పార్టీ ఎల్లవేళలా అండగా ఉంటుందన్నారు. జిల్లా, రాష్ట్ర స్థాయిలోనే కాక అవసరమైతే తానూ కదలి వస్తానన్నారు.

తమ పార్టీ కార్యకర్తలపై దాడులకు పాల్పడే ముందు కాంగ్రెస్ నేతలు భవిష్యత్ గురించి ఆలోచించాలని హెచ్చరించారు. కొద్ది రోజుల్లో తాము అధికారంలోకి రాబోయే విషయాన్ని గుర్తెరిగి మసలుకుంటే మంచిదన్నారు. తెలుగుదేశం పార్టీ పోలిట్ బ్యూరో సమావేశం గురువారం జరిగింది. ఈ సమావేశంలో ఉప ఎన్నికల్లో పోటీ చేసే పార్టీ అభ్యర్థుల పేర్లు ఖరారు చేశారు. తెలుగుదేశం పార్టీ నాయకురాలు నన్నపనేని రాజకుమారి వడదెబ్బకు సొమ్మసిల్లి పడిపోయారు. ఆమెను వెంటనే ఆస్పత్రికి తరలించారు.