బుష్ కు వైయస్ వత్తాసు: బాబు

నల్లగొండ: అమెరికా అధ్యక్షుడు జార్జి బుష్ కు ప్రధాని మన్మోహన్ సింగ్, రాష్ట్ర ముఖ్యమంత్రి డాక్టర్ వైయస్ రాజశేఖర రెడ్డి వత్తాసు పలుకుతున్నారని తెలుగుదేశం పార్టీ అధ్యక్షుడు నారా చంద్రబాబునాయుడు విమర్శించారు. ఆహార పదార్థాల నిల్వల కొరతపై బుష్ చేసిన ప్రకటనను ఆయన ఖండించారు. చంద్రబాబు మీ కోసం యాత్ర ఆదివారంనాడు నల్లగొండ జిల్లాలోని హుజూర్ నగర్, కోదాడ తదితర ప్రాంతాల్లో జరిగింది. కేంద్ర, రాష్ట్ర ప్రభుత్వాల వైఫల్యం వల్లనే ధరలు పెరిగాయని ఆయన విమర్శించారు. ధరలను అదుపు చేయలేకపోతే కేంద్ర, రాష్ట్ర ప్రభుత్వాలు రాజీనామా చేయాలని ఆయన డిమాండ్ చేశారు.

ప్రత్యేక ఆర్థిక మండళ్లు (ఎస్ఇజెడ్ లు) రియల్ ఎస్టేట్ కేంద్రాలుగా మారాయని ఆయన విమర్శించారు. ఉద్యోగాల పేరుతో ప్రాణాలు తీస్తున్నారని ఆయన వ్యాఖ్యానించారు. వైయస్ రాజశేఖర రెడ్డి పాలన తుగ్లక్ పాలనను తలపిస్తోందని ఆయన అన్నారు. అధికారంలోకి వచ్చి నాలుగేళ్లయినా వైయస్ రాజశేఖర రెడ్డికి పాలనపై పట్టు రాలేదని ఆయన అన్నారు. ఇళ్లు, ఇర్రిగేషన్, ఆయకట్టులపై ప్రభుత్వం చెబుతున్నవన్నీ కాకిలెక్కలేనని ఆయన అన్నారు.