వైయస్ నోటికొచ్చిన లెక్క: బాబు

గుంటూరు: గుంటూరు మిర్చి యార్డు అగ్నిప్రమాదం విషయంలో ముఖ్యమంత్రి డాక్టర్ వైయస్ రాజశేఖర రెడ్డి నోటికొచ్చిన లెక్క చెబుతున్నారని తెలుగుదేశం పార్టీ అధ్యక్షుడు నారా చంద్రబాబునాయుడు విమర్శించారు. ప్రమాదానికి గురైన గుంటూరు మిర్చి యార్డును ఆయన సోమవారం ఉదయం సందర్శించారు. బాధిత రైతులను పరామర్శించారు. ఆత్మహత్య చేసుకున్న రాఘవరావు అనే రైతు కుటుంబ సభ్యులను పరామర్శించారు. మిర్చి యార్డు ప్రమాదంలో సంభవించిన నష్టం గురించి ముఖ్యమంత్రికి స్పష్టత లేదని ఆయన అన్నారు.

ఆత్మహత్యలు చేసుకోవద్దని ఆయన రైతులకు సూచించారు. బాధిత రైతుల గోడు వినేందుకు తాను ప్రత్యేకంగా వచ్చానని ఆయన చెప్పారు. రైతులకు న్యాయం జరిగే వరకు పోరాడుతామని ఆయన హామీ ఇచ్చారు. బాధిత రైతులు చంద్రబాబును చుట్టుముట్టి తమ గోడును వెల్లబోసుకున్నారు. ముఖ్యమంత్రి తమ గోడు కూడా వినడానికి సమయం కేటాయించలేదని వారు చెప్పుకున్నారు.