బాబుకు అడ్డు తగిలిన కాంగ్రెస్ వర్కర్లు

గుంటూరు: గుంటూరు మిర్చియార్డులో తెలుగుదేశం పార్టీ అధ్యక్షుడు నారా చంద్రబాబునాయుడు ప్రసంగాన్ని అడ్డుకునేందుకు కాంగ్రెస్ కార్యకర్తలు ప్రయత్నించారు. మార్కెట్ చైర్మన్ అనుచరులు ఇందుకు పాల్పడ్డారు. దీంతో ఉద్రిక్త వాతావరణం చోటుచేసుకుంది. కాంగ్రెస్ కార్యకర్తలు రౌడీయిజానికి పాల్పడుతున్నారని, దాదాగిరి చేస్తే సహించేది లేదని ఆయన అన్నారు. రౌడీ షీటర్ ను మార్కెట్ చైర్మన్ గా చేశారని ఆయన విమర్శించారు.

మార్కెట్ యార్డు ప్రమాదంపై చంద్రబాబునాయుడు పలు అనుమానాలు వ్యక్తం చేశారు. మార్కెట్ యార్డును ఇక్కడి నుంచి తరలించేందుకు కుట్ర జరిగిందని, ఇందులో భాగంగానే అగ్ని ప్రమాదం జరిగిందని ఆయన అన్నారు. విద్యుత్ స్తంభానికి ఢీకొట్టి ప్రమాదానికి కారణమైన లారీ ఏమైందని ఆయన ప్రశ్నించారు. మార్కెట్ యార్డును ఇక్కడి నుంచి తరలించవద్దని, ఇదే స్థలంలో తిరిగి నిర్మించాలని ఆయన డిమాండ్ చేశారు. రైతులంతా రోడ్డెక్కి ఆందోళన చేస్తే తాము ముందుంటామని ఆయన చెప్పారు.