చంద్రబాబుది రాక్షసత్వం: రోశయ్య

హైదరాబాద్: తెలుగుదేశం పార్టీ అధ్యక్షుడు నారా చంద్రబాబునాయుడు కుట్రలూ కుతంత్రాల్లో పుట్టి పెరిగారని రాష్ట్ర ఆర్థిక మంత్రి కె. రోశయ్య వ్యాఖ్యానించారు. రియల్ ఎస్టేట్ వ్యాపారం కోసం గుంటూరు మిర్చి యార్డును తగులబెట్టారని చంద్రబాబునాయుడు చేసిన విమర్శలపై ఆయన సోమవారం మీడియా ప్రతినిధుల సమావేశంలో తీవ్రంగా ధ్వజమెత్తారు. ప్రతిపక్ష నాయకుడి హోదాలో రైతులను ఆదుకోవాల్సిన చంద్రబాబు ఈ విధమైన విమర్శలు చేయడం తగదని ఆయన అన్నారు.

చంద్రబాబు నీచస్థాయికి దిగజారిపోయారని ఆయన వ్యాఖ్యానించారు. రైతుల పట్ల సానుభూతి ఉండే నాయకులెవరూ ఈ విధంగా మాట్లాడబోరని ఆయన అన్నారు. దేవుడనేవాడు ఉంటే చంద్రబాబును క్షమించబోడని ఆయన అన్నారు. రాక్షసత్వంతో చంద్రబాబు వ్యవహరిస్తున్నారని ఆయన అన్నారు. చంద్రబాబు ఆరోపణలను మార్కెటింగ్ శాఖ మంత్రి మారెప్ప కూడా ఖండించారు.