ఎలాగైనా అర్థం చేసుకోవచ్చు: ఎన్టీఆర్

హైదరాబాద్: తాను నటించిన కంత్రీ సినిమాలో రాజకీయ సంభాషణలున్నాయని అన్నారని, వాటిని ఎవరు ఏ విధంగానైనా అర్థం చేసుకోవచ్చునని కంత్రీ సినిమా హీరో జూనియర్ ఎన్టీఆర్ అన్నారు. ప్రేక్షకులతో కలిసి ఆయన శుక్రవారం ఐ మాక్స్ థియేటర్లో కంత్రి సినిమా చూశారు. నిర్మాత అశ్వనీదత్, హీరోయిన్ హన్సికతో కలిసి ఆయన థియేటర్ కు వచ్చారు. కంత్రి వందశాతం యూత్ ఎంటర్టైనర్ అని ఆయన అన్నారు.

ప్రేక్షకులతో కలిసి సినిమా చూడడం ఆనందంగా ఉందని ఆయన చెప్పుకున్నారు. సినిమా భారీ విజయమని అంతటి నుంచి సమాచారం వస్తోందని ఆయన అన్నారు. సినిమాకు లభించిన ఆదరణ తనకు ఎంతో సంతోషంగా ఉందని ఆయన అన్నారు. సినిమా ప్రేక్షకులను అలరిస్తుందని ఆయన చెప్పారు. సినిమా సూపర్ హిట్ అని హీరోయిన్ హన్సిక అంది.