చిరంజీవి పార్టీపై వైయస్ అంచనాలు

హైదరాబాద్: మెగాస్టార్ చిరంజీవి పెట్టబోయే రాజకీయ పార్టీ వల్ల కాంగ్రెసుకు మేలే జరుగుతుందని ముఖ్యమంత్రి డాక్టర్ వైయస్ రాజశేఖర రెడ్డి అంచనా వేస్తున్నారట. శుక్రవారం జరిగిన మంత్రి వర్గ సమావేశంలో చిరంజీవి పెట్టబోయే పార్టీపై చర్చ జరిగినట్లు తెలుస్తోంది. చిరంజీవి పార్టీ పెడితే కాంగ్రెసుకు ఏ విధమైన నష్టం జరగదని ముఖ్యమంత్రి అన్నారట. ప్రభుత్వ వ్యతిరేక ఓటు ముఖ్యంగా ప్రధాన ప్రతిపక్ష పార్టీకి వెళ్తుందని, ప్రధాన ప్రతిపక్షం తెలుగుదేశం బలహీనంగా ఉందని, అందువల్ల ప్రభుత్వ వ్యతిరేక ఓటు తెలుగుదేశం, చిరంజీవి పార్టీ రెండూ పంచుకుంటాయని ముఖ్యమంత్రి మంత్రులకు వివరించినట్లు చెబుతున్నారు.

చిరంజీవి పార్టీ వల్ల తెలుగుదేశం పార్టీ ఎక్కువ నష్టపోతుందని ఆయన అన్నట్లు సమాచారం. తాము అమలు చేస్తున్న అభివృద్ధి, సంక్షేమ పథకాల వల్ల ప్రజల్లో వ్యతిరేకత లేదని, గతంలో కన్నా కాంగ్రెసుకు ప్రజామద్దతు పెరిగిందని ఆయన అన్నట్లు సమాచారం. తమకు సిపిఐ, సిపిఎం, తెలంగాణ రాష్ట్ర సమితి దూరమైనా కాంగ్రెసుకు నష్టం లేదని, గతంలో కన్నా మెరుగ్గా ఉన్నామని ఆయన చెప్పారట. ఉప ఎన్నికల్లో మంత్రులు బాధ్యతగా వ్యవహరించి కాంగ్రెసును గెలిపించాలని ఆయన సూచించారు. అధిక ధరలపై మంత్రివర్గం చర్చించింది. ధరల అదుపునకు బ్లాక్ మార్కెట్ ను అరికట్టడానికి చర్యలు తీసుకోవాలని మంత్రివర్గ సమావేశం నిర్ణయించింది.