వైయస్ పై రాఘవులు ధ్వజం

హైదరాబాద్: గత 2004 ఎన్నికల్లో ఎవరి తోక పట్టుకుని ముఖ్యమంత్రి డాక్టర్ వైయస్ రాజశేఖర రెడ్డి గోదావరి ఈదారని సిపిఎం రాష్ట్ర కార్యదర్శి బి.వి. రాఘవులు ప్రశ్నించారు. వామపక్షాలకు సిద్ధాంతాలు లేవని ముఖ్యమంత్రి చేసిన వ్యాఖ్యపై ఆయన గురువారం మీడియా ప్రతినిధుల సమావేశంలో తీవ్రంగా ప్రతిస్పందించారు. ప్రభుత్వ అవినీతిని ప్రశ్నిస్తే సిద్ధాంతాలు లేనట్టా అని ఆయన అడిగారు.

వ్యక్తిగత విమర్శలు చేయడం ముఖ్యమంత్రి హోదాకు తగదని ఆయన అన్నారు. ఎన్నికలకు ముందు రాజశేఖర రెడ్డి ఏం చెప్పారు, కుర్చీ మీద కూర్చోగానే ఏ సిద్ధాంతాలు ఆచరిస్తున్నారని ఆయన అడిగారు. ఎన్నికలకు ముందు ప్రపంచ బ్యాంకు విధానాలను తప్పు పట్టిన రాజశేఖర రెడ్డి విద్య, వైద్యం, సాగునీటి రంగాల్లో ప్రపంచ బ్యాంకు సూచనల మేరకే నడుచుకుంటున్నారని ఆయన విమర్శించారు.